Муносибатҳо миёни Ҷумҳурии Тоҷикистон ва Давлати Қатар
Муносибатҳои дипломатӣ байни ду кишвар 13 декабри соли 1994 барқарор шуданд. Моҳи ноябри соли 2012 Сафорати Давлати Қатар дар шаҳри Душанбе ва моҳи майи соли 2013 Сафорати Ҷумҳурии Тоҷикистон дар Давҳа кушода шуданд.
Робитаҳои сиёсӣ. Дар таърихи муносибатҳои дуҷониба сафари расмии Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Давлати Қатар 6-7 майи соли 2007 саҳифаи нав кушод ва ба рушди босуръати минбаъда замина гузошт. Сафари расмии ҷавобии Амири Давлати Қатар Шайх Ҳамад бин Халифа Оли Сонӣ ба Ҷумҳурии Тоҷикистон моҳи августи соли 2007 сурат гирифт, ки он аввалин сафари роҳбари як давлати арабӣ ба Тоҷикистон буд.
Баргузории сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Давлати Қатар 5 – 7 феврали соли 2017 бо даъвати Амири Давлати Қатар Шайх Тамим ибни Ҳамад Оли Сонӣ ва музокироти сатҳи олӣ дар Давҳа ба раванди тасеаи муносибатҳои гуногунҷанбаи ду кишвар такони ҷиддӣ бахшид. Бо дастури роҳбарони олии ду кишвар байни вазоратҳои корҳои хориҷӣ абзори машваратҳои сиёсӣ дар сатҳи вазирон, муовинони вазир ва роҳбарони раёсатҳо ташкил шуд.
Инчунин, сафари кории Амири Давлати Қатар Шайх Тамим ибни Ҳамад Оли Сонӣ ба шаҳри Душанбе рӯзҳои 14-15 июни соли 2019 ҷиҳати иштирок дар Ҳамоиши панҷуми Машварати ҳамкорӣ ва тадбирҳои боварӣ дар Осиё ва музокироти расмии ӯ Президенти Ҷумҳурии Тоҷикистон муҳимтарин рӯйдод дар раванди таҳкиму тавсеаи робитаҳои дуҷонибаи сиёсӣ арзёбӣ мешавад.
29-30 марти 2021 ҳайати Давлати Қатар таҳти роҳбарии Султон бин Саид ал-Мурейхӣ – Вазири давлатӣ оид ба корҳои хориҷӣ дар Конфронси вазирони “Қалби Осиё-Раванди Истанбул” иштирок намуд. Дар ҳошияи ин чорабинӣ мулоқоти дуҷонибаи ҳайати қатарӣ бо Вазири корҳои хориҷии Ҷумҳурии Тоҷикистон баргузор шуд.
Қайд кардан ба маврид аст, ки баргузории машваратҳои сиёсӣ дар шаҳри Душанбе 24 октябри соли 2018 ва 26 январи 2020 дар шаҳри Давҳа таҳти роҳбарии муовинони аввали вазирони корҳои хориҷии Ҷумҳурии Тоҷикистон ва Давлати Қатар барои густариши минбаъдаи ҳамкориҳои мутақобилан судманд дар заминаҳои сиёсӣ, иқтисодӣ ва иҷтимоӣ, пешбурди ибтикороти созанда дар ҳошияи созмонҳои минтақавию байналмилалӣ, мубориза бо терроризму ифротгароӣ ва пайгирии дигар масъалаҳои мавриди эҳтимоми таваҷҷуҳи ду тараф омили муҳим арзёбӣ мешавад.
Робитаҳои байнипарлумонӣ. Бо ҳадафи густариши робитаҳои дуҷониба бо қарори Маҷлиси намояндагони Маҷлиси Олии Ҷумҳурии Тоҷикистон аз 04.01.2019 Гурӯҳи дӯстӣ ва ҳамкории байнипарлумонӣ бо Маҷлиси Шӯрои Давлати Қатар таъсис дода шуд. Ба ин мақсад дар парлумони Давлати Қатар (Маҷлиси шӯро) гурӯҳи ҳамкорӣ бо кишварҳои Осиё фаъолият мекунад. Маҷлиси Шӯрои ин кишвар пас аз интихоботи моҳи октябри 2021 дар аввали соли 2022 Гурӯҳи мазкурро дубора таъсис дод.
Заминаҳои шартномавӣ-ҳуқуқӣ. Заминаи ҳуқуқии ҳамкориҳои Тоҷикистон ва Давлати Қатарро 16 санади байниҳукуматӣ ва байниидоравӣ ташкил медиҳад.
Ҳамкориҳо дар соҳаи амният. Робитаҳои корӣ байни вазоратҳои корҳои дохилии ду кишвар барқарор шудаанд. Дар ҳошияи сафари Вазири корҳои дохилии Ҷумҳурии Тоҷикистон ба Давлати Қатар дар рӯзҳои 16-18 феврали соли 2019 суҳбату музокироти дуҷониба бо Сарвазир- Вазири корҳои дохилии Қатар, Прокурори генералӣ ва Намояндаи махсуси Давлати Қатар оид ба масъалаҳои мубориза алайҳи терроризм ва ҳалли низоъҳо танзим карда шуданд.
Дар заминаи ҳамкориҳои созандаи дуҷонибаю бисёрҷониба Давлати Қатар дар танзими ду конфронси сатҳи баланди байналмилалӣ оид ба масъалаҳои мубориза бо терроризм ва ифротгароӣ, ки моҳи майи соли 2018 ва моҳи майи соли 2019 дар шаҳри Душанбе баргузор шуданд, саҳми шоиста гузошт.
Ҳамкориҳои иқтисодӣ-тиҷоратӣ. Давлати Қатар аввалин кишвари арабӣ мебошад, ки дар Тоҷикистон сармоягузорӣ кардааст. Самараи он дар маблағгузории сохтмони “Масҷиди калони Душанбе” (дар ҳаҷми 91,3 млн доллари ИМА), ки бузургтарин масҷиди ҷомеъ дар Осиёи Марказӣ аст, дида мешавад. Ширкати қатарии “Диёр” дар пойтахти кишварамон лоиҳаи сармоягузории “Диёри Душанбе”-ро татбиқ менамояд. То ин вақт марҳилаи якуми лоиҳаи мазкур ба анҷом расидааст. Ширкати мазкур ният дорад дар солҳои наздик марҳилаи дуюми лоиҳаро анҷом диҳад (ҳаҷми умумии сармоягузории қатарӣ дар Тоҷикистон ҳудуди 300 млн. доллар арзёбӣ мегардад).
Давлати Қатар дар ҳамаи сатҳҳо изҳор менамояд, ки ба арзишҳои фарҳангию иҷтимоӣ ва тадбирҳое, ки ҳукуматҳои кишварҳои Осиёи Марказӣ, аз ҷумла Ҷумҳурии Тоҷикистон барои таъмини амнияти миллӣ ва рушди босуботи ҷомеа амалӣ менамоянд, эҳтиром мегузорад ва дар самти муқовимат бо терроризму ифротгароӣ шарики боэътимоди кишварҳои минтақа аст.
