Таҷлили Наврӯзи байналмилалӣ дар намояндагиҳои дипломатии Ҷумҳурии Тоҷикистон дар хориҷи кишвар

19 марти соли 2024 бо ташаббуси Сафорати Тоҷикистон дар Федератсияи Русия ҷашни хуҷастаи Наврӯзи байналмилалӣ бо иштироки меҳмонон, ҳамватанони бурунмарзӣ, намояндагону фаъолони ҷамъиятҳо, чеҳраҳои маъруфи аҳли зиё, доираҳои соҳибкорон аз ҳисоби ҳамватанони муқим ва донишҷӯёни тоҷик баргузор гардид.

Дар чорабинӣ дастархони тоҷикӣ бо “Ҳафтсину Ҳафтшин”, таомҳо ва шириниҳои тоҷикӣ орододашуд. Инчунин китобҳо дар бораи Тоҷикистон, намуна аз либосҳои гулдӯзӣ, чакан ва дигар ҳунарҳои мардумӣ ба намоиш гузошта шуданд.

19 марти соли 2024 дар Сафорати Ҷумҳурии Тоҷикистон дар Ашқобод бо иштироки намояндагони корпуси дипломатии муқими Туркманистон, меҳмоно, ҳамватанон ва кормандони намояндагӣ ҷашни байналмилалии Наврӯз таҷлил карда шуд.

Дар чорабинии идона гӯшаи фарҳангӣ бо хӯроку шириниҳои лазизи наврӯзӣ ва хони ҳафтсину ҳафтшин ороста шуда, намунаҳои либосҳои миллӣ, аз қабили сӯзаниву гулдӯзӣ, асарҳои кулолӣ, асбобҳои мусиқӣ ва ҳунарҳои дастии қадимаи мардумӣ, ба намоиш гузошта шуданд.

20 марти соли 2024 бо ташаббуси намояндагиҳои доимии Тоҷикистон, Эрон, Афғонистон, Озарбойҷон, Қазоқистон, Қирғизистон, Ҳиндустон, Покистон, Ироқ, Туркманистон, Туркия ва Ӯзбекистон дар қароргоҳи Созмони Милали Муттаҳид чорабинии тантанавӣ бахшида ба таҷлили ҷашни Наврӯзи байналмилалӣ доир гашт.

Ҳамоиш бо паёмҳои табрикии Раиси иҷлосияи 78-уми Маҷмаи Умумии СММ Денис Френсис ва намояндаи ЮНЕСКО Лили Грей оғоз гардид.

21 марти соли 2024 бо ташаббуси Акимати иҷроияи ноҳияи Нурини шаҳри Остона, Сафорати Ҷумҳурии Тоҷикистон дар Ҷумҳурии Қазоқистон дар ҷашни байналмилалии Наврӯз, ки бо шукӯҳу шаҳомати хосса дар Боғи марказии шаҳри Остона таҷлил карда шуд, фаъолона иштирок намуд.

Дар таҷлили ҷашни бузурги аҷдодӣ Сафорати Тоҷикистон дар Остона гӯшаи фарҳанги миллиро иборат аз маводи таҷассумгари фарҳангу таърих ва нигораҳои миллӣ ташкил кард, ки он дар маркази таваҷҷуҳи меҳмонони сершумор қарор гирифт.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan