Муносибатҳои дуҷонибаи Тоҷикистон бо Юнон

Муносибатҳои дипломатӣ байни Ҷумҳурии Тоҷикистон ва Ҷумҳурии Юнон 30 сентябри соли 1992 барқарор шуданд.

20 майи соли 2008 даври якуми машваратҳои дуҷонибаи сиёсӣ миёни Вазорати корҳои хориҷии Ҷумҳурии Тоҷикистон ва Вазорати корҳои хориҷии Ҷумҳурии Юнон дар ш. Душанбе баргузор гардиданд. Тибқи барнома, ҳар ду кишвар оид ба муносибатҳои дуҷониба, ҳамкориҳои минтақавӣ ва амниятӣ, инчунин ҳамкории Тоҷикистон ва Юнон дар чаҳорчӯбаи созмонҳои байналмилалӣ, аз қабили САҲА ва СММ, табодули назар карданд.

1 декабри соли 2022 дар шаҳри Лодз дар ҳошияи иҷлоси 29-уми Шӯрои вазирони Созмони амният ва ҳамкорӣ дар Аврупо (САҲА) вазири корҳои хориҷии Ҷумҳурии Тоҷикистон Сироҷиддин Муҳриддин бо вазири корҳои хориҷии Юнон Никос Дендиас вохӯрӣ намуд. Дар рафти суҳбат масъалаҳои рушди муносибатҳои дуҷониба ва бисёрҷонибаи Тоҷикистон ва Юнон мавриди табодули назар қарор гирифтанд. Ҷонибҳо инчунин ҷиҳати тавсеаи ҳамкориҳо дар соҳаҳои иқтисоду тиҷорат, сайёҳӣ, маориф ва фарҳанг, инчунин дар чаҳорчӯби созмонҳои байналмилалӣ табодули назар карданд.

Пояи қарордодӣ-ҳуқуқии ҳар ду кишвар дар ҳоли ташаккулёбӣ қарор дорад.

                                                                                                                                                                                                                                                                   Ноябр, 2025